中華總商會月底搞「千萬行」活動，會長蔡冠深同啲副會長尋日秘密試新裝，攞住套Polo恤款式嘅「千萬行」制服左試右試。呢款衫設計簡單，其實唔難着，何解一眾高層咁緊張？原來係怕失禮，事關有啲會董因近日酒會連場，食得多肚腩現形，加大碼T恤都着唔落。
「牛仔褲大王」兼副會長楊釗靜雞雞透露，有份參加步行嘅會董擔心T恤唔啱身會大出洋相，於是提前幾日試新裝，唔少會董試身後都要求要件大碼或者加大碼，身形肥咗都有位走盞喇。
不過仍有部分會董覺得唔啱身，褲王靈機一觸參考高衩旗袍設計，將衫身兩邊剪高幾吋，做成一個小衩位，件衫睇落鬆動晒。問佢會唔會考慮將件衫側邊扯高少少綁個結點綴吓，佢笑住擰頭話：「唔會喇，你估我係g模咩！」