呢排酒會開唔停，尋日輪到文化界同中華出口商會搞聯歡酒會，期間撞見藝術發展局主席馬逢國，佢講起跑酒會經歷，話唔好以為好過癮，仲自爆前日喺一晚內走咗三檔酒會，點知返到屋企依然要走落街食雲吞麵。何解咁淒涼？皆因其中一個宴會開席太遲，當佢餓住個肚趕去另一酒會時，人哋又早已開席，仲食到七七八八，晚飯當然冇着落啦。
喺中華出口商會個酒會就見到入境處處長白韞六，追問有關副處長趙偉佳突然放長假單嘢，係咪同處理商務及經濟發展局副局長蘇錦樑卡片事件失當有關，白處長連聲否認：「唔係，你哋唔好猜測喇，冇咁嘅事。」有傳聞指趙Sir放完長假後會調職，白處長耍太極話：「放完假再算啦！」