日本著名漫畫家臼井儀人日前登山失足墮崖過身，佢嘅代表作《蠟筆小新》頓成絕響，有啲小新迷已開始搶購《蠟筆小新》系列產品，同樣係小新迷嘅立法會保險界議員陳健波就選擇摷番封塵多年嘅《蠟筆小新》錄影帶出嚟重溫，緬懷一番。
陳健波平時咁正經，點都唔似會鍾意睇呢類無厘頭搞笑漫畫喎！佢笑言大約十年前電視熱播《蠟筆小新》卡通片，當時佢讀緊小學嘅大仔集集都有追，睇親都「騎騎笑」，佢原先因為好奇個仔笑啲乜而睇埋一份，點知一睇就欲罷不能。佢覺得小新人細鬼大兼奀皮，爸爸野原廣志又夠鬼馬，睇睇吓除咗好笑外，有時仲感同身受添。