逃避抽秤特登做場騷

環保團體當然係希望政府帶頭身體力行推動環保啦，但煲呔曾做呢場騷簡直暴露咗佢以往一直都唔環保。點解？眾所周知，禮賓府位於上亞厘畢道，政府總部就喺下亞厘畢道，只係一街之隔，要嘥幾多腳骨力啫！

煲呔曾平時咁縮骨，斷估佢唔會捨近取遠，我哋實地測試同佢計過數，由禮賓府後門出發，行四十米斜路，再行二十級樓梯，再落五十米斜路，就抵達政府總部，路程只係需要四分鐘，就算加埋開完會回程，加埋十分鐘都唔使。

坐車當然係快啲，但係就要兜好大個圈。專家話香港一般路面情況，揸二千cc嘅車已經好夠用，但煲呔曾座駕嘅引擎容量差唔多有五千cc，釋出嘅二氧化碳比二千cc嘅私家車多六成半。如果佢坐車由禮賓府去政府總部，來回一轉行車里數大概為一點二公里，每年就會排出約三噸二氧化碳。

為咗唔畀環保團體繼續抽秤，煲呔曾今日先特登做呢場騷，點知仲係爛騷嚟添！事關佢平時去政府總部都係車來車去，為慳腳骨力就不惜周街放毒氣。記得前幾年佢話要推出藍天行動，原來佢亦係污染空氣同加速氣候暖化嘅幫兇。

再講吖，煲呔曾有番咁上下年紀，平時飲宴應酬又多，日日行落政府總部開會，咪當係晨運囉，仲可以放少啲廢氣，咁先係一舉兩得嘛！