小白觀點

懵盛盛充大頭鬼

房屋署使咗納稅人三千萬換，竟然唔試清試楚，又冇實地視察，只係靠一張陳年圖則就訂購，一動工至知衰咗，竟然發覺唔啱size，當堂死晒火。

好心啦，本身明明係Small Boy，就應該有啲自知之明，毫無自知之明死充大頭鬼，以為自己都係Super Big Boy，好嘞，依家搞到埋門一腳至知原來真係唔啱用，掃興唔在講吖，仲令到香港人好冇面添。

認吓命啦，東方人同西方人嘅size係有分別，一定要試真啲。鬼佬Fit晒，我哋就用到甩吓甩吓，萬萬不能一句中國人可以「超英趕美」，就以為可以蒙混舢舨充炮艇，因為呢樣嘢，差些少都隨時搞出人命㗎。

網友觀點...X）...

[志健]

做少少嘢都錯成咁，衰偷懶啦，睇都唔睇圖則就訂，今次真係大大鑊。

[欣希]

交稅就係養呢班懶人豬人，咁樣都錯得，分分鐘安裝完都會墮。

[kenix]

大拿拿三千萬，都唔知有幾多個工程、幾多個三千萬就咁嘥咗，真係唔想交稅。

[明哥]

唓，最後咪又當冇事，再用多納稅人三千萬買過之嘛，又唔使有人負責嘅，幾easy！

阿豪觀點

房署解釋愈描愈黑

房屋署喺啟業邨裝新，點知size唔啱，工程要延期完成。呢單蝦碌嘢令豪伯諗起《老夫子》一個古仔：老夫子忽然心血來潮，買咗兩尊石獅子返屋企擺，點知屋企門口太窄，卒之搞到要放喺走廊算數。

不過政府搞錯size都唔係第一次㗎喇，正如網友卜勤話齋，政府當初搞迪士尼樂園，咪又係搞錯咗size，不過呢鑊係太細而唔係太大咁解啫。房署解釋話喎，舊圖則顯示大廈係磚牆，但實際上係石屎牆，加上架缺乏部分物料，所以先至要重新審批工程。唓，講到好似搞錯物料好過搞錯size好多咁，太空人試吓着對啱size嘅白飯魚上太空吖，睇吓會點！

網友觀點...X）...

[卜勤]

香港政府不嬲都對size冇乜概念，迪士尼細咗，政改又玩大咗。

[井澤廣美]

今次就話size唔啱安裝唔到啫，點知下次會唔會size太細，安裝完之後架罅太闊㗎！

[小新]

size唔啱可大可小㗎，有啲嘢用錯咗size，可能導致人口爆炸添呀！

[Johnson Lo]

今次事件，反而應該追究點解明明有圖則，但係竟然仍會出錯，咁當初啲又係點樣起出嚟嘅呢？