人稱「好打得」嘅發展局局長林鄭月娥呢排忙住搞文物保育，尋日佢出席世界水監測日活動時，仲自誇發展局旗下九大部門喺佢統領下同樣「好掂」，將文物保育嘅理念推廣到全港，所以遲啲佢會去信其他政府部門，希望佢哋亦效法自己旗下嘅部門，將文物保育融入日常工作喎。
林鄭咁講，好明顯佢係叫其他部門好好向佢旗下嘅部門學習啦，但人哋聽起嚟未必咁諗，會唔會覺得佢喺度認叻，借踩人哋嚟墊高自己呢？
佢口中嘅「其他部門」，當然包括康樂及文化事務署啦，同場嘅康文署助理署長吳志華就係當年唔見咗二十二項孫中山文物嘅當事人，上次追問佢時，佢就落荒而逃，尋日被困水塘避無可避，終於開腔回應事件。
吳志華話事件已經係「好多年前嘅嘢」，部門非常重視，隨後幾年已吸取經驗，做咗好多改善。咁佢當年負責去美國點收文物，下個月立法會討論事件時會唔會親自解畫？佢即刻有所保留，話呢件唔係佢個人嘅事，未知會唔會出席喎。
對於林鄭嘅「溫馨提示」，吳志華就反應好大咁話「康文署不嬲都好乖嘅」，康文署轄下有古物古蹟辦事處，每次其他部門有保育問題，都會好樂意畀意見喎。