近排「媽打」李麗娟為咗今晚舉行嘅同齡同心籌款晚宴忙到暈，早幾日去佢屋企，見佢成張飯枱都係文件。佢話今次晚宴會同班老友一齊慶祝六十歲生日，專程由北京返港嘅駐京辦前主任梁寶榮，加上藍鴻震、林煥光同何志平三位民政事務局嘅前話事人都會嚟撐佢。
籌款晚宴原本只係分別捐錢畀兩個慈善機構，其中一筆係捐畀香港復康會幫四川地震兒童做康復，但最近媽打突然決定幫埋禁毒常務委員會籌款。咁咪將兩份錢分成三份？佢即時好大反應咁話︰「梗係唔係啦，點可以分薄原本兩個機構嘅善款㗎！係預算再籌多一百萬呀，所以先咁忙，不過依家搞掂晒喇！」佢仲自爆依家每個月幾萬蚊長俸都捐晒畀唔同慈善機構，仲笑稱：「就嚟冇錢開飯喇！」但佢跟住就話︰「不過做女人點都有啲租收吓嘅！」