昔日喺立法會手握十票嘅富貴黨，每月都會同煲呔曾見面一次溝通，但人情冷暖，自從舊年十月富貴黨元氣大傷後，煲呔曾就再冇咁好客，而富貴黨同政府嘅關係亦變得愈嚟愈疏離。弱勢嘅煲呔曾尋日突然約咗富貴黨三名正、副主席去禮府飲下午茶，唔通想補鑊？不過，一隻手掌係拍唔響嘅，究竟係咪修補到都成疑問，大家要拭目以待嘞。
黨主席Miriam劉健儀證實今次係煲呔曾做主動，雙方傾咗一粒鐘，席間煲呔曾叫富貴黨以後對施政有意見可早啲出聲，唔使一嚟就頂到行。
煲呔曾突然邀約下午茶，係咪想同富貴黨「和好」呢？Miriam話唔估人哋係點諗喇！咁經過尋日後，富貴黨同煲呔曾係咪回復昔日每月一聚嘅慣例呢？佢話煲呔曾冇講。