Caspar自爆喺英國劍橋大學宿舍附近求婚，皆因未婚妻劍橋畢業後喺英國從事金融服務業，佢舊年年初就買定婚戒，飛去英國會合女友。求婚當日，佢先喺木櫈上同女友情話綿綿一番，見四處無人即跪下求婚，氹到女友心花怒放，一口答應做徐太。

之不過，未婚妻依家在中東公幹，所以忙到連結婚相都冇時間影，佢亦因工作繁忙，攞婚假亦只揀咗結婚當日同婚前一日，留待十月尾再攞兩個禮拜大假，同嬌妻飛去溫哥華拜會外父、外母，再諗住飛去泰國做義工。

Honey Moon都去做義工？佢笑言喺動物園做義工好處多，既可親近小動物，又可幫大象洗白白，機會難得，未婚妻都拍手叫好喎。