日前Bernard打正「潮州冷」旗號，邀請十幾位潮州商會高層人士去嶺大嚟個「半天遊」兼食晚飯。Bernard先招待一眾潮州鄉里飲杯茶、食件餅，閒話家常後就轉入正題，吐苦水話嶺大今年籌款金額大墮後，原因唔係班校董唔夠牙力，而係嶺大「先天不足」，畢業生少人一大截，加上該校畀外界標籤為「次級大學」，想敲人門攞錢都難。之後佢再加多兩錢肉緊推銷，話家族旗下嘅公司已帶頭請咗幾個嶺大畢業生，其中一個表現突出，一年內升幾級又加薪，佢強調加對方人工前唔知佢係嶺大生喎。

散席時問到潮州商會秘書長，佢話暫時未有參觀嘉賓提出捐錢。Bernard對此並唔失望，仲話最緊要畀人認識嶺大嘅獨特教學理念，太快獅子開大口問人攞錢，只會惹人反感喎！