「民主阿婆」陳方安生缺席上禮拜一泛民舉行嘅第二次政改「武林大會」，因而被揭佢老公陳棣榮病咗，仲嚴重到要入醫院治療。本報尋日報道有關消息後，民主阿婆尋日隨即發表聲明，證實老公陳棣榮因患上十二指腸潰瘍穿孔，日前喺醫院接受手術後，正喺深切治療部（ICU）接受觀察同治療，但冇交代要觀察幾耐。
民主阿婆喺聲明中話過去兩個禮拜，佢老公病情嚴重，感謝醫務人員嘅悉心治療，目前情況穩定，逐漸康復，正因為咁，佢暫時唔會參與任何公開活動，集中精神同家人一齊照顧丈夫。有專科醫生話，年紀大嘅人患十二指腸潰瘍穿孔嘅危險性較高，情況惡劣可引致細菌感染，可大可小，要視乎手術後初段嘅康復情況。
民主阿婆原定呢個禮拜飛去美國，展開長達個幾月嘅美加巡迴唱衰香港之旅，依家都要逼住取消或押後行程，未知幾時先可以啟程。