除咗冇訓斥犯事學生之外，徐校長仲幫本港學生講好說話，佢話好多人都讚內地學生叻過本港學生多多聲，以佢本人觀察，內地學生的確係好認真學習，皆因佢哋嚟到香港讀書，已經係經過精挑細選，係用破釜沉舟式嘅讀書方法，唔會放過任何一個學習機會，總之就乜嘢都唔會蝕底啦。

教仔講道理盞嘥氣

咁內地學生係咪真係叻過本港學生呢？徐校長就好得體咁話，兩者根本就好難比較，因為香港都有好多出色嘅學生，而且本港學生頭腦靈活，好識得變通，唔會你叫佢做乜就做乜，呢啲特質好可貴，總之內地同本港學生各有長處。

雖然徐校長唔係一個嚴校長，但佢就係一個不折不扣嘅嚴父，話說徐校長有兩個仔，喺佢哋細個嗰時，自己已經成日同佢哋講道理，同太太一個惡死一個好人，諗住可以夾手夾腳教好兩個仔，但後來佢先明白，原來小朋友根本唔會理乜嘢道理，仲會愈教愈反叛添。依家兩個仔都長大成人，大家有商有量，關係反而更好。

徐校長仲話若要教好下一代，身教同家庭教育係非常重要，佢一家四口以前住喺加拿大，每年都一定會抽一個禮拜時間，成家人一齊去度假，既可以增加溝通機會，又可以享受親子樂；平時仲要畀空間仔女自由發揮，咁佢哋就可以快樂成長嘞！