小白觀點

瀕死時會見隧道曙光

唔經唔覺，金融海嘯爆咗已經一年，曾俊華同埋陳家強兩條友成日喺度唱雙簧，一時話「金融海嘯已經完結」，一時又話「在隧道的盡頭已見到曙光」。唉，拜託啦，唔出聲冇人話你哋啞㗎，真係愈講愈心寒呀。

呢個金融海嘯令好多人都捲晒出海，睇吓杜拜世界島嘅買家，本來都係頂級富豪，經過一場海嘯之後，唔係撻訂就自殺，認真得人驚，殺傷力唔低過南亞海嘯幾多㗎咋。

兩個高官話隧道見到曙光，都可能冇講錯。小白老弟睇過本書叫《Many lives,Many masters》，話唔少人瀕死嘅時候，又係見有條隧道，又係見到有曙光，兼且仲有人揮手添呀，但書中冇講嗰個人有冇鬚噃！

網址：www.sunsiupak.blogspot.com

網友觀點......

艇仔聰

個個都出嚟話經濟已開始復甦，我一啲都唔覺，失業嘅失業，欠債嘅咪又係未還清，邊有好轉吖。

kenneth kenneth

富者變窮，窮者更窮，金融海嘯真係害得人多，點止要周年祭，十年都要祭啦。

達榮

政府由金融海嘯出事話救市，講到依家，做過啲乜吖，跳樓嘅又跳晒，咩基建連粒塵都見唔到。

可兒

海嘯永遠都係深不見底，唔知幾時又會一個浪撲埋嚟，到時連樹根都抓唔住，一鑊熟。

卜勤

唔使一年啦，你見街上啲人消費有減弱過咩？

奧賣葛

伯南克都話最低潮已過，但係我就三個月都搵唔到工，到底應該信專家定係信自己感覺？

苦主

依家只係樓市同股市好，其他行業仲係低潮期，睇見好多酒樓都仲係捱唔住要執笠就知啦……

了鳥

我都想老闆信吓鬍鬚曾呀，「共度時艱」嗰啲嘢快啲完，補番啲扣咗嘅人工同福利啦！

阿豪觀點

鬍鬚曾預測經濟鋪鋪錯

乜啲專家唔係話呢劑金融海嘯可能係上世紀三十年代大蕭條以嚟最大鑊嘅一次咩？講到經濟復甦，就更加係英文字母滿天飛，又L又U，梗係唔見個V字。咁點解短短一年後，鬍鬚曾居然可以振臂一呼，話本港經濟已經「喺隧道見到曙光」？

好彩香港人出晒名鍾意賭錢，賭仔都鍾意睇往績，就算同「往績」完全無關嘅大小、六合彩等都唔例外。好嘞，睇番鬍鬚曾以往講親經濟預測、赤字預算，以至「釘木板」可以抵抗金融海嘯等，次次都係錯，所以佢呢鋪話香港經濟露曙光，根本冇人會跟佢「下注」。簡單啲講，香港人都知聽鬍鬚曾老點，會好似師傅話齋：「出事㗎嘛！」大家一早已經睬佢都傻矣！

網址：www.lukchiho.blogspot.com