近期城中名士爭相喺酒會蒲頭，政府一眾高官亦接帖接到手軟。尋日有個場合就有大批高官、名人捧場，不過一早接帖博露面嘅鬍鬚曾就遲大到，喺所有嘉賓登台後都未出現，加埋有個嘉賓亦遲到，令主禮台上零零舍舍留咗兩個窿。事後鬍鬚曾尷尷尬尬咁登場，台下有冇人用睥垃圾蟲嘅眼神望佢就唔知嘞，但高官身邊秘書、助理一大堆，佢都咁冇時間觀念，好抵鬧啫！
尋日嘅酒會喺晏晝十二點半開始，會方已刻意押後咗典禮時間，到十二點四十分，司儀逐一邀請各主禮嘉賓上台，當各就各位後，鬍鬚曾依然未到，即係話佢遲咗差唔多十五分鐘。隔多一陣，香港中華總商會會長蔡冠深致辭時，佢先上台埋位。
呢啲畀面派對，係政商界開拓人脈嘅地方，唔尊重場合，只會產生反效果，想得到避免麻煩嘅絕招，或者應該向立法會秘書長吳文華請教吓，佢話近期十．一酒會好多，自己會篩選吓先至出席，避免太頻撲。