我哋早前講過建制派抄泛民橋，搞咗個食飯嘅溝通機制，呢個飯局梗係唔止飲茶吹水咁簡單，「金勞詹」詹培忠透露，呢個三十六名建制派議員（唔計立法會主席）新組合，將以「協助執政大聯盟」嘅合作概念運作，即係基於愛國愛港原則，協助港府施政。不過，煲呔曾唔好開心得太早，話明係「協助」性質，如果特區政府失政失德，大聯盟照砌可也，到時三十六個一齊出手，炳得政府仲甘。
據悉，協助執政大聯盟只係一個合作概念，唔會真正「起朵」，而且建制各黨派咁高咁大，亦唔會設召集人，以後由最疊馬嘅建仔定期擺下鴻門夜宴，嚟緊最快喺十月中再次開飯。
立法會內嘅建制黨派一向各家自掃門前雪，突然搞協助執政大聯盟，背後相信一定有人發功牽線，想為港府極之重大、尤其觸及中央底線嘅敏感政策做定保護網。不過，說易行難，以前建仔同富貴黨都係「執政聯盟」一分子，最後都煙消雲散，希望協助執政大聯盟唔會重蹈覆轍啦。