泛民主派上禮拜一舉行第二次政改「武林大會」，就所謂嘅普選終極方案敲定共識，但喺背後一手策劃有關大會嘅「民主阿婆」陳方安生，居然冇現身攝位搶曝光。佢老友當日就爆料話民主阿婆老公陳棣榮病咗，被迫缺席失場。
據講，陳生嘅病情似乎唔輕，仲一度入醫院治療，不過就唔清楚係乜嘢病。有知情人士就證實，民主阿婆喺早一個禮拜為咗照顧老公，幾乎終止晒所有對外同對內嘅活動，連原定喺呢個禮拜飛去美國，展開長達個幾月嘅美加巡迴唱衰香港之旅，依家亦被迫押後，部分演講活動需要取消同改期。
不過亦有指民主阿婆最近幾日都有活動，但係就唔知陳生係咪已完全康復同出咗院。陳生對上一次公開露面，係喺今個月三號陪同民主阿婆出席佢叔父方心讓嘅喪禮，當時陳生雖然容貌消瘦，但尚算精神同行動自如。