高等教育界尋日喺尖東香格里拉酒店舉行聯歡晚宴，全城大專院校嘅正、副校長雲集，呢班學界猛人聚頭，竟然大講「撲水」心得。公開大學月前首次參加政府配對補助金計劃，三扒兩撥籌到逾億元，公大校長梁智仁尋日解釋，以前行醫時醫好唔少人，病人投桃報李，將錢捐畀公大作答謝，最大筆捐款有成二千萬銀，佢真係安樂晒。
港大校長徐立之、浸大校長吳清輝、城大校長郭位、仁大校監胡鴻烈、科大校長陳繁昌、公大校長梁智仁等，尋日齊集宴會廳舉杯暢飲。返咗兩個禮拜工嘅科大新校長陳繁昌話，上任後最大挑戰係不停識人，四出拜訪教職員、學生同校友， 日日返朝七收晚十一，都咪話唔辛苦。
