本文重點
經濟動力喺富貴黨分裂出嚟之後，兩個陣營不時傳出挖角、爭黨友嘅消息，焦點當然係被視為地盤大戰嘅新一屆區議會選舉同下一屆立法會選舉啦。暑假期間，建制派陣營先傳出富貴黨可能由前主席田北俊拉攏新界東嘅龐愛蘭（Scarlett）捲土重來嘅消息，不過，尋日Scarlett卻埋咗經濟動力堆，大家攜手一齊搞禁毒活動，佢仲話同經濟動力合作幾愉快添！唔通經濟動力嘅林健鋒（Jeffrey）搶先田少一步，奪得美人歸？
Jeffrey梗係唔肯認自己撬牆腳啦，講嘢時仲面色一沉，好認真咁話佢哋早喺今年七月已經籌劃呢個抗毒行動，意思係經濟動力發起攻勢嘅時間比富貴黨同Scarlett嘅「緋聞」更早發生。呢次爭女行動到底係撬牆腳定係被撬牆腳，甚至係其他發展，睇怕都唔會有結論囉。
幫手搞抗毒活動
講番經濟動力尋日嘅「同心結力抗毒大行動」記者招待會，佢哋除咗邀請一班抗毒委員出席之外，緋聞女主角兼沙田區議員Scarlett當然喺現場啦。問到佢係咪改投經濟動力懷抱，Scarlett笑笑口咁話今次經濟動力搵佢嚟幫手做禁毒，係睇中佢有八年做抗毒嘅經驗，佢自己冇諗太多其他嘢喎。
不過，Scarlett就大讚經濟動力做嘢好認真、好細緻，睇嚟合作得幾開心。咁富貴黨呢？佢就話至今未同富貴黨合作過，暫時都唔知夾唔夾。既然佢咁垂青經濟動力，第時會唔會同佢哋喺其他範疇，例如選舉方面繼續合作呢？Scarlett唔肯正面回應，笑意更深咁話：「不如講番禁毒啦！」
今次經濟動力同Scarlett先喺禁毒工作上合作，加深認識後，再開拓更深層關係都好自然，呢個相遇相知嘅過程，唔一定係男歡女愛專用嘅！