不過唔使怕，民政事務總署署長陳甘美華今年四月雨季前，已經好高瞻遠矚咁帶咗二十幾個政府部門去大澳做咗場演習大騷。署長話當天文台預測到颱風或暴雨，水位可能喺五小時後浸到一個成年人心口嘅時候，會向相關政府部門以及大澳居民代表發出預警短訊，將貴重物品搬至較高嘅地方。

真係唔講得笑，嗰個特別為大澳居民度身訂造嘅水浸預警系統，今次終於發揮咗些少作用，離島民政事務處嘅疏散及救援計劃隨即啟動，民安隊隊員、消防員以及警員立即出動協助當地居民疏散去臨時庇護站。

冇錯，雖然今次過程中多少都仲有啲甩漏，好似話有居民投訴收唔到水浸預警系統發出嘅警告訊息咁。不過總體嚟講，政府部門出奇地冇互相卸膊，的確係百年不遇，難得一見呀，似乎要拍手讚吓喎。

咪住！諗吓諗吓好似有啲唔對路喎，點解陳甘美華會好似先知咁，估到大澳會水浸呢？唔通佢係魔術師，有預測未來嘅本領？

叮！其實邊係吖，喂，係人都知劑劑有颱風或者大雨，大澳都會成為水浸嘅重災區o架啦。舊年六月一場黑雨，大澳咪又出現嚴重水浸，搞到斷水斷糧又斷路，當地居民孤立無援；九月又嚟個颱風黑格比，有幾百人受困。

事後特區政府成班高官只係識得頻頻做騷，又拍晒心口話一定會解決大澳水浸問題。事隔一年，結果又點呀？喺水浸黑點永安街起條阻止海水倒灌嘅防波堤咁簡單，竟然要等到明年至動工，要二○一一年先至有望完工。

叮，公務員加人工就快過火箭，但人命關天嘅防洪工程竟然拖得就拖，有冇離譜啲呀！所以話呢，今次所謂嘅應變措施就算做得再好又點吖，原來全部係治標唔治本，防災工作獨沽一味靠避難。

即係話，喺未來一段日子，大澳居民要繼續處於高度戒備狀態，一落大雨，一有颱風，最好做足心理準備等收水浸「中獎」短訊，坐橡皮艇當遊船河，住臨時庇護站當度假囉。

叮佢個鎯鎯，又話香港係國際大都會？連水浸都搞唔掂，仲話要活化大澳，發展成為香港重要旅遊景點添，真係唔搞好過搞咯。你知啦，外國旅客未必收到預警短訊，到時如果一個唔好彩沖走一個，呢條本來唔多穩陣嘅旅遊經濟支柱，實聽一齊沖冧埋都得嘞。