鄉議局籌建新大樓獲得商界大孖沙慷慨科水，但據講有成二十幾個鄉事委員會仲未交數，又未搞籌款活動催谷善款，主席劉皇發同一眾高層好心急，發叔打算聯同兩位副主席，在下月中親自落鄉「收數」。
鄉議局執委會尋日匯報新大樓籌款工作差強人意，仲建議外聘籌款公司協助籌款工作，近排持續有大孖沙捐款，連同上月新世界發展董事總經理鄭家純捐出嘅五百萬元，已籌得逾七千萬元，而海外鄉紳就總共捐出九百萬元，夾埋佔咗大半工程費，好明顯「差強人意」四隻字係衝住二十幾個鄉委會，發叔以前試過扯火叫班鄉紳飲水思源，話有權利就有義務。
局方本嚟希望每個鄉可以籌到二百萬元，二十七個鄉共有五千四百萬元，但聽聞現在只得大埔鄉事委員會超額交出六百萬元，其他鄉就未見影，難怪發叔要親自下鄉做收數佬啦。