颱風「巨爵」襲港，唔少低漥地區又再水浸，民政事務總署署長陳甘美華尋日同傳媒喺八號波落咗冇耐有個約會，花名叫騰雞嘅佢尋日一到現場就好緊張問人打風嘅安排點樣？交通情況有冇混亂？之後猛講今次大澳水浸預警系統嘅運作，出晒力唱好風球下嘅政府運作！
騰雞尋日好關心風球下嘅操作，聽到與會者都話順利時，佢明顯鬆咗口氣，講起大澳再見水浸情況，佢大讚今次嘅水浸預警機制發揮效用，並透露按照原本嘅機制，居民本應該半夜先收到通知，佢哋唔想擾人清夢，今次特別提早咗通報，佢仲好識做咁話要多謝大澳鄉事委員會幫手通知居民，先減輕咗今次嘅水浸情況。
不過，今次水浸依然有好多民居入晒水，有啲居民更話用埋土法防洪都冇用，睇嚟騰雞有必要進一步改善颱風預報系統，譬如喺颱風下真人預報水浸，咁就更加有效啦。