立法會中俗稱「五散人」嘅五名建制派獨立議員，早前傳出要加強合作，連煲呔曾早前諮詢政黨對施政報告嘅意見時，冇獨立見佢哋亦引嚟不滿，不過，五散人嘅醫學界代表怪醫梁家騮，就對其他四名散人冇喺佢業界關心嘅議題上撐佢有怨言，仲話鍾意自由散打添。
怪醫認為「五散人」重組喺各個委員會嘅分工，其實係搵自己笨，事關如果五人真係特別關注某個議題，就更加應該冧多啲友入去相關嘅事務委員會，而唔係每個委員會都只派一兩個人，分散自己嘅實力，譬如佢喺衞生事務委員會，成日都要以一敵眾，反而啲泛民主派仲不時會撐吓佢，暗批其餘四人冇出力幫自己。
至於改名一事，佢就話「五散人」呢個名其實相當唔差，充分反映到佢哋嘅運作同特質，又強調五人當初走埋一齊，已經講明唔會綑綁投票及放棄獨立身份，睇唔到點解要改變初衷。