阿Ron尋日出席一個馬會活動時，被問到近排股市表現，佢就話，投資者入貨，至少要了解個市場、公司業績同管理層表現，而馬迷想贏錢，都要刨吓馬經研究賽績，即係話，無論買乜嘢，都要研究清楚，唔係眯埋眼亂咁博。

咁買馬同買股有冇乜嘢唔同呢？阿Ron話其實兩者好唔同，賽馬始終係博彩娛樂，而股市就係金融業操作嘅專業投資，論風險，賽馬當然較大，也唔適宜瞓身！

雖然風險大，阿Ron十多歲留學英國已同同學刨馬仔，本月初賽馬開鑼日，佢就買咗三場三重彩同四連環贏咗幾千蚊，我哋問佢咁多年贏錢嘅威水史時，佢詐諦睇吓太太夏安麗：「老婆喺度，都係唔講嘞！」唔通阿Ron勤做功課之後，有好多贏嚟嘅錢都瞞住太太？

愛駒翠河標本永久展出

近日阿Ron○五年已故嘅愛駒「翠河」標本被放置喺賽馬博物館永久展出，佢八九年買入「翠河」，九○年出賽首季六戰六勝，包括贏埋打吡，「翠河」服役期間贏得總獎金近二千萬元，阿Ron贏錢都贏埋人氣，當年立法局同僚叫佢參加直選，只要拉住「翠河」出街拉票就sure win！

唔講唔知，「翠河」父馬同母馬原來都係屬於阿Ron所有，所以佢對「翠河」嘅感情好似親生仔一樣，連愛駒退役返回澳洲，佢都同太太去探望。