小白觀點：善長仁翁愛心爆棚

唔係話賣花讚花香，香港人雖然有N咁多個缺點，但係講到愛心，真係無話可說，雖然我哋畀呢個特區政府搞到一窮二白，要勒緊褲頭過緊日子，之但係大吉利是每當鄰近地區凡親有乜特大天災橫禍，港人即刻慷慨解囊。原來香港人愛心爆棚到連香港迪士尼樂園有難，一樣兩肋插刀硬撐。

香港迪士尼連內地同胞聽到都打晒喊露，依家竟然有雙位數字增長喎，原來係多得香港各界善長仁翁鼎力支持，入場數字甚至超越內地旅客，認真唔話得。不過正所謂長貧難顧，香港迪士尼世界小得真奇妙，怕且再係咁落去，終有一日要搞吓「星光熠熠耀樂園」，甚至係「愛心滿竹篙」至得咯。

網友觀點......

詠芝

我就唔信啦，個個去完香港迪迪都有彈冇讚，點會有人去完又去咁笨吖，一定造數啦。

小丸子

話晒都係香港嘅迪士尼吖，雖然又細又唔好玩，但都要撐吓場嘅。

志成

哈，我估係連大陸同胞都知搵笨唔去啫，根本冇多到，係少咗大陸同胞就真。

麵包超人

香港迪士尼一開始就知唔work啦，嘥晒納稅人嘅錢，早啲轉型好過啦，仲救佢。

網址：www.sunsiupak.blogspot.com

阿豪觀點：拜託樂園咪起分店

香港人出名有愛心，無論係四川地震，抑或係台灣水災，甚至係遠至南亞嘅海嘯，都見到香港人嘅善款。如果香港發生大災難，港人就更加會義不容辭咁幫手，好似迪士尼樂園咁呀，開幕以嚟入場人數長期低迷，但係喺港人鼎力入場支持下，依家人數已經超過內地同埋東南亞旅客嘞。

幫人係好事，但都要幫得其所，正如捐錢畀災區都要目及實當地政府有冇用嚟重建，迪士尼都一樣，好快啲執番靚啲景點設施；而如果將港人同迪士尼樂園比喻為情侶，咁我哋喺你落難嗰陣照顧你，你係咪應該修心養性咪再拈花惹草呢？拜託迪士尼樂園唔好始亂終棄，成日話要喺四周圍起分店啦！

網友觀點......

卜勤

香港迪士尼真係……小。畀香港人多個貴價公園仔囉，想幫香港搵錢就真係幻想世界。

匿名

門票咁貴，入場人數升番就快啲減價啦……

廖尚恆

你班人係咪都鬧，一個願打一個願捱啫！

客迭

依家終於知道乜嘢叫冤豬頭都有盟鼻菩薩……

網址：www.lukchiho.blogspot.com

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。