唔講唔知，獨立監察警方處理投訴委員會（監警會）主席翟紹唐尋日踢爆投訴警察個案上升「幾嚴重」，投訴警察課今年頭七個月收到嘅投訴個案，比舊年同期上升咗五成八，其中投訴警員疏忽職守及態度欠佳嘅數字，更加多咗七成。

叮，短短一年，投訴幾乎多咗成倍，唔通香港換咗班警察執法？真係愈睇愈得人驚。翟紹唐話，投訴警察數字飆升，可能同經濟低迷有關喎。

咁嘅解釋荒唔荒謬啲呀？經濟環境好唔好同警察做嘢掂唔掂，簡直係大纜都扯唔埋嘅兩件事。唔通因為有金融海嘯，警察就可以亂嚟，做乜都得，隨便鬧人、拉人，甚至剝人光豬？

講真，呢幾年警方嘅執法態度一直為人詬病。呢嗱，上個月尖沙咀一幢大廈有市民懷疑因為私人恩怨，畀管理員困喺入面近十分鐘。咁樣做可能涉及非法禁錮，但警員到場之後，略作調查就話唔涉及刑事成分，就咁算數。警察有法不執，有法不依，你話市民仲有乜安全感吖！

辦案敷衍了事，是是但但不特止，警員濫用武力、粗暴執法嘅例子更加數不勝數。早排元朗馬田村有兩兄弟半夜聽到有爆門聲，落樓睇吓，結果畀班突然衝入屋嘅大漢打咗一身，哥哥懷疑畀人打到耳膜都穿埋，失去部分聽力。後來至搞清楚，原來係差人掃毒，懷疑收錯風，好人當賊辦。最離譜嘅係警察涉嫌打人前既冇表露身份，又冇出示搜查令，難怪兩兄弟大鬧：「差人同賊冇分別！」

叮！執法唔依程序，隨便打人，兵賊不分，仲成世界嘅？呢幾年警隊負面新聞多多，唔單止成日爆出「暴力刑警」一類醜聞，涉及警員道德操守嘅衰嘢同樣不絕於耳：粗暴對待性工作者兼食霸王餐、洩漏臥底以及報案人資料、隨街拉市民剝光豬搜身，甚至喺警署認人房強姦及非禮女報案人咁離譜嘅事都有。

醜聞一籮籮，愈爆愈大鑊，好明顯係警隊內部管理出咗大問題啦。如果唔改善管理、速速整頓同提高質素，市民仲點相信警隊有能力打擊罪惡，維持治安吖。翟紹唐話，監警會嘅角色以前較為被動，喺新條例下，該會可以主動介入同跟進針對警方嘅投訴。既然係咁，唔該快啲做嘢，千祈咪再求求其其、是是但但吖。

投訴數字係咁升，警隊聲譽係咁跌，如果馬虎處理，甚至偏袒警方，唔單止有負市民期望，仲會令惡警變本加厲，更加橫行霸道，監警會只會成為睇得唔打得嘅無牙老虎。叮！