小白觀點

狗狗入門豪過元首出巡

有區議員建議喺屯門藍地起個狗泳池，都啱嘅，依家啲狗仲矜貴過人，西安有個有錢女用四百萬人民幣買咗隻藏獒，早幾日搞個隆重歡迎儀式接狗狗入門，三十架名車開路，排場勁過國家元首出巡，起個狗泳池等呢班大腕嚟使錢都好吖。

話時話，周不時有愛狗人士喺大熱天時三十幾度拉狗行山，要勞煩消防員哥哥出動抬番隻中暑狗落山，好彩呢班好漢平時喺油尖旺受過人肉白車特訓，問題唔大。但正所謂欺山莫欺水，當局連人用嘅泳池都未管得掂，何況係狗泳池？如果隻狗喺泳池畀隻老鼠嚇親，或者一口吞咗舊「浮金」浸親，整死隻四百萬人民幣嘅藏獒就手尾長喇！

網友觀點...X）...

[SiU 風]

如果要起狗泳池嘅話，咁就起埋其他動物嘅專屬泳池啦，仲要喺十八區各起一個……

[懶人]

咁早幾年點解要清晒泳池啲紅蟲？嗰時個泳池已經變做紅蟲泳池啦！

[波兒]

當然要整個狗泳池啦，人有人權，狗有狗權吖嘛。

[Hume]

唔係啩，咁使唔使整天竺鼠泳池、貓泳池、福鱷泳池呀？劃出一個狗隻吸煙區吖笨！

阿豪觀點

狗主罰款夠康文署加薪

對於屯門起狗泳池，豪伯相信康文署會舉腳贊成。

大家知啦，康文署管理嘅公眾泳池一團糟，三日唔埋兩日就出現「浮金」，起咗狗泳池後就唔使驚啦，事關狗隻喺公眾地方大小二便，狗主有責任清理番佢，到時話唔埋會有人專程入屯門，睇人表演潛入水底用報紙包起狗糞呢一項高難度動作添！此外，狗主整污糟公眾地方嘅千五蚊定額罰款，集腋成裘絕對唔嘢小，所得隨時可以幫全體康文署官員逆市加薪添！

不過政府咪咁快開心住，不患寡而患不均，因住其他養寵物人士好似紀律部隊咁扭計，呢個話要起貓音樂廳，嗰個又話要起錦鯉足球場，到時問你順得邊個意！

網友觀點...X）...

[Patrick Lai]

係請狗救生員都唔錯，可以創造就業。但唔知使唔使同啲狗做人工呼吸喎……

[泳客]

連人嘅泳池都唔夠用，仲話起狗泳池？？

[匿名]

起乜鬼，為後生起咗戒毒學校先啦，狗又唔會吸毒。

[匿名]

每年夏天，公共泳池逼到死，仲浪費資源起狗泳池？咁遲啲使唔使起貓圖書館、雀鳥音樂廳呀？留番畀人類好喎……