鋼琴王子李雲迪呢個月二十七號來港，喺理大舉行一場名為「Music First」嘅慈善音樂會，除咗李雲迪外，仲有京奧開幕禮作幕後獻唱嘅美少女楊沛宜，佢會唱番○八奧運主題曲《我和你》，並同劍橋大學合唱團一齊即席表演。負責搞音樂會嘅「嘉頓新抱」兼著名珠寶設計師張王幼倫話，香港人喺金融海嘯下愁眉不展，希望藉今次音樂會帶嚟歡樂氣氛，難得李雲迪聽到個構思後，即刻應承。
張太一向係音樂發燒友，佢自爆識咗雲迪八、九年，今次係兩人第四度攜手合作，過去佢亦安排過另一年輕鋼琴家郎朗來港表演，最近更情迷古典吉他演奏家楊雪霏。不過張太自謙唔識玩樂器，只係喺熱愛古典音樂嘅醫生老公張力正耳濡目染下，每晚一放工跳上座駕就會扭開Hi-Fi聽歌，對李雲迪更好瘋狂，買齊晒佢所有音樂碟。
據聞音樂會當晚仲會舉行慈善晚宴，三百幾位政商界名人將出席。當晚收益將撥捐多個機構，包括英國劍橋大學等，皆因今年係劍橋大學成立八百周年，張太老公係劍橋醫學院舊生，公子Adrain同千金Amanda亦分別就讀劍橋法律系同經濟系。