身為香港人，好多人都未必對呢個地方有歸屬感，做咗三年香港人嘅「體操王子」李寧就唔同，佢尋日出席一個活動時話，喺香港生活好好，同囝囝都好適應，因為香港有特色，又有特殊文化，佢仲指指現場數以百計參加者話，香港係一個幾有愛心嘅社會添！香港人真係應該學吓佢喇。
循輸入內地人才計劃成為香港人嘅李寧，一家大細都移居香港，囝囝李小寧亦喺香港嘅學校讀書。李寧本身係南方人，適應香港嘅生活並冇難度，仲好活躍於本地體育同名人圈活動添！不過近排佢都有嘢煩惱，事關被早年嘅傷患所困擾。
李寧早前因為脊椎骨刺增生要入院做手術，佢解釋呢次舊患復發同去年做京奧凌空點火無關，有可能係做運動員時嘅訓練所致，但主要係年紀大啦，幸好依家康復得唔錯，仲可以游水添！年底本港會舉行東亞運動會，李寧話佢都會買飛捧場。