尋日嘅火炬傳遞活動可以用「蚊型」嚟形容，火炬傳遞只係喺九龍公園傳約一公里，同奧運火炬幾乎傳遍全港、東亞運火炬傳過維多利亞港兩岸完全冇得比。朝早十點鐘活動開鑼，約莫半個鐘頭已經傳遞完畢，真係打針都冇咁快。

有心無力定冇心慳力？

其實尋日嘅活動好有意義，仲即席向香港代表隊授旗，希望佢哋喺全運會攞啲好成績返嚟，但煲呔曾同負責體育活動嘅德成局長同康文署馮程淑儀呢個班底，對個活動就明顯唔夠重視，整場活動嘅氣氛比起奧運、東亞運都明顯不如，最弊係好多市民唔知道有呢個盛事，就好似煲呔曾喺荒山中舉行大龍鳳一樣。

口痕友都話唔明白點解當局喺咁近嘅日子連搞兩次火炬傳遞，無論係疏於宣傳定太多盛事逼埋一齊，都會出現反高潮，做搞手嘅人到底係有心無力定係冇心慳力呢？

其實，香港好需要協辦同參與大型運動會嘅經驗，年底舉行嘅東亞運動會不利消息多多，一陣傳場地有問題，一陣又被揭設施唔符合規定，真係令人頭痕。港協暨奧委會會長霍震霆都話希望政府再加大力度做宣傳，仲話就算叫佢粉墨登場幫手做宣傳，佢都樂意去做，總之希望搞好咁難得嘅體育盛事啦。