邊個咁夠照？咪廉政專員湯顯明囉，佢前日證實，兩個月前啱啱夠六十歲已經脫離公務員隊伍，但唔使執嘢走人，因為即時獲得煲呔曾私下繼續請番。據講，佢仲可以撈多三年，咁啱到時佢老細亦夠鐘落台，兩個「共同進退」。

高官屆滿退休年齡因為實際需要獲得續任，譬如做埋啲手尾或者為咗工作交接順利，本來唔係問題，但咁嘅情況通常只會續任半年到一年。湯顯明一做就做多三年，咁嘅畸士從未有過。

公務員退休續任要公務員敍用委員會批准，雖然話廉政專員個位冇呢方面限制，但一續就係三年，又唔解釋理由，對其他夠鐘食長糧又唔獲續任嘅同事好唔公平啫。正如公務員工會聯合會主席梁籌庭所講，煲呔曾有走法律罅之嫌，呢次係壞嘅先例，似乎「鍾意點做都得，成個系統隨佢意向嚟發展」。

叮！湯顯明破格續任，政府依據乜準則批准冇人知，畀人任人唯親嘅感覺。廉政專員續任咁大件事，政府居然冇公布，如果唔係本報踢爆，件事可能不了了之，明顯又係黑箱作業啦。唔怪得立法會議員直斥咁係「任意妄為、冇規冇矩」。

至弊嘅係，湯顯明唔止可以轉個身份留低，任期仲同煲呔曾睇齊，令本來應該政治中立嘅職位變得「政治化」，廉署嘅獨立形象嚴重受損，連塊金漆招牌都邋遢埋。咁有爭議嘅決定，到底係中央政府做嘅，定係港府自作主張？

叮！搞出咁大鑊，輿論反應強烈，有議員直斥「不尋常到令人不安」。煲呔曾不以為然，仲話「呢啲通常事幹嚟啫」。梗係啦，港府任人唯親，私相授受，市民都唔係第一次領教咯。

呢嗱，當局舊年豪花幾千萬請十幾個副局長同政治助理，遴選過程同準則一概唔公開，被指係瞞上欺下、亂點鴛鴦，以公帑為煲呔曾建立「御林軍」。有議員話，呢次廉政專員續任手法「離晒譜」，比委任副局政助更加難睇，一啲都冇講錯。

遴選金管局新總裁，同樣係黑箱作業嘅傑作。原特首辦主任陳德霖被踢爆係內定人選，財爺鬍鬚曾開口夾着脷話有遴選委員會。但八人名單除咗攞命陳外，其餘七人連自己榜上有名都矇查查，更從未參與過面試，根本又係場自編自導自演嘅爛Gag騷。

當年有句口號叫「廉署保密，密密實實」，呢次廉政專員續任唔單止密密實實，更加係核核突突，再整多幾單「通常事幹」，香港乜嘢國際形象都冇晒啦。叮！