奧巴馬應學甘迺迪掃貨

聽講今年全球有十五個國家宣布禁收月餅，理由係因為月餅內有蛋黃，因為有啲國家收緊咗禽肉蛋製食品入口政策，所以連月餅都畀佢累埋，即係話，今年過中秋節，海外龍族要食自己，或者買四個豬柳蛋漢堡，求其放入鐵盒當月餅頂住檔囉。講起就把幾火，都係禁運啫，記得當年美國對古巴實施禁運，甘迺迪總統簽署禁令之前，特登搵咗個親信幫佢狂掃古巴雪茄，呢單假公濟私醜行，竟然成為美國政壇美談。小白老弟好想問，奧巴馬總統成日同中國人扮Friend，因乜事唔上CNN親身示範掃一千盒雙黃白蓮蓉呢？事關裏面唔理係三黃、四黃，其實可能都係假蛋黃呀！我國嘅拳民係時候快啲出動為月餅鳴冤！

中秋前夕宣布明剃眼眉

早前有十五個國家宣布禁收月餅嘅郵件，話係考慮到禽流感同豬流感肆虐喎。嘩！中秋食月餅係我國優良傳統，禁止入口，即係明剃我哋眼眉啫！大家不妨睇吓禁運月餅國家嘅名單，竟然有乍得、蘇丹同緬甸等傳統同中國友好嘅國家，如果你話唔係有敵對勢力喺幕後策動，真係打死我都唔信。

一年三百六十五日邊日唔好宣布，偏要中秋前夕宣布禁令，仲唔係別有用心？雖然喺飲食方面，最愛國嘅熱血青年都未必敢用國貨，但係由外國人禁運就勢係假。我睇同胞們有必要反擊，禁運番對家嘅食品，好似話蘇丹紅雞蛋咁—吓，又係國貨？乜唔係蘇丹出產嘅紅雞蛋咩？

網友觀點...X）...

[　風花雪　]

咁惟有將冰皮月餅代替傳統月餅……不過，如果中秋節冇傳統月餅食又真係會好唔慣……

[　文禮陸　]

將月餅變成出奇蛋咁，有得食又有得玩，又唔怕被人禁，正呀！

[　匿　名　]

飛來香港吃，家庭團圓，航空公司又得益。

[　嫦娥姐　]

我哋啲月餅有乜得罪美國佬啫，使唔使趕到咁絕呀，真係要反美！

[　lok　]

人在異鄉已經夠慘㗎啦，仲要中秋節都冇月餅食……唉……

[　匿　名　]

甚麼年代，中秋節一定要食月餅咩？成家人一齊食梳打餅都開心呀。生命攸關，將就吓啦。

[　working class hero　]

至怕依家唔係「月餅」呢種食品出問題，而係「中國製造」領嘢呀……

[　了　鳥　]

吓？有無搞錯！！咁樣傷害中國人民感情，點都要做番啲嘢喎。