立法會勞工界議員李鳳英今年二月喺立法會地下同一樓之間失足碌落樓梯，搞到腰骨受傷，住院外又要做物理治療，足足搞咗幾個月，好在依家已經康復。為防悲劇重演，立法會行政管理委員會之前決定要將立法會啲樓梯大改造，以符合最新嘅建築物條例要求。
樓梯早前竣工，諗住搵埋英姐一齊去視察吓，但佢話事情過咗咁耐，自己條腰又好番晒，唔想再提嘞！都係嘅，上次英姐碌落樓梯，頭同膊頭落地令雙腳同盆骨受傷，都幾嚴重，接受治療後有好一段時間都要用輪椅出入，唔想再提都好正常。英姐就平常心咁話冇乜特別，以後都會照行。
立法會三個出入口嘅樓梯都整晒，除將單邊扶手改為雙邊扶手，又將樓梯擴闊，仲將以前嘅欄杆改為更加安全嘅玻璃，總之安全指數大增，上落又比以前舒服。改建後嘅樓梯，不論顏色同用料都同古色古香嘅立法會大樓好夾，唔留意都唔覺唔同咗，呢點先係最難得。