白鴿黨立法會前議員「單雞」單仲偕舊年原定空降港島區參選，但因為遭到港島支部嘅黨友反對而被迫棄選。前日喺灣仔地鐵站內撞到佢，佢話冇議員做，冇得喺中環立法會停車場泊車後，就好少再揸車落港島區，以免要周圍搵車位，但佢強調以前都有不時搭吓地鐵，唔覺得有乜唔方便，反而因 為唔會塞車而少咗遲到。
單雞又話以前做議員由朝到晚都要開會，又要見選民，又要接受傳媒訪問，對身心好唔健康，依家佢日日瞓足八個鐘，有時九點半就撻落床，五點半就起身晨運，仲有時間炒股同約朋友吹水，生活都唔知幾寫意。
佢把口講到好似想永久退出政壇咁，但心裏面又係咪咁諗呢？我哋聽聞佢仍然好想重返立法會，港島區同新界西都諗過，但前者好難同已經上咗位嘅黨友甘乃威爭位，後者亦有等緊上位嘅張賢登頂住，最後度嚟度去都只有九龍西有些微機會，最近喺大角咀租咗個地區辦事處，好快就開張大吉，甚至會考慮食回頭草降格參選區議會試吓水溫。吹到氹氹轉，咁究竟係咪喺九龍西落腳吖？佢話如果搵到位就當然博吓，但亦唔會強求喎！咁即係仲未知飛去邊啦！