發叔早前向本報預告，經濟動力最快明年初有望成功組黨。3L尋日有個聚會，當然追問呢個消息，而3L就異口同聲話冇排除任何可能性。

咁3L係咪唔會重返富貴黨？蘇菲高聲回應：「Never say never（永不說不）！」原來佢聽錯以為記者問組黨，知道原委後，句說話即刻話收番。對於會否重返富貴黨，答案是否Never（永不）至啱呢？

佢哋組黨未成，但喺組織上似乎有唔錯嘅進展。林健鋒宣布經濟動力成立咗八個小組，分別係環保、基建及物流、會員發展、珠三角合作、中小企、旅遊、青年、政制與社會八大範疇，每月開會一次，每組設召集人。至於召集人係邊位？三、四人如何負責八個專責小組，佢哋就話：「唔講畀大家聽，第日至公布。」究竟係虛擬嘅八個小組抑或有實質運作，相信大家要畀啲耐性睇吓嘞！