立法會資訊科技界議員「IT豪」譚偉豪日前同太太去咗日本神戶自駕遊，期間專程揸咗個幾鐘頭車，去知名漫畫家手塚治虫嘅紀念館參觀。係咪想去了解吓日本著名嘅動漫產業，以便協助香港嘅業界發展？佢就尷尷尬尬咁話都有小小關係嘅，但最主要原因係佢老婆好鍾意手塚治虫漫畫，尤其係細個喺電視睇過嘅卡通片《藍寶石王子》，近年仲學埋日文以便深入了解當地文化，一年閒閒地會去日本玩兩次。
兩公婆又去咗當地嘅新進旅遊點和歌山玩，IT豪話和歌山嘅溫泉當然出名，但最令佢印象深刻嘅反而係當地酒店嘅管理，佢哋入住嗰間酒店跟足日本傳統文化，一踏入門口就嚴禁着鞋，連商場、餐廳同升降機都係咁，但行足全日，對腳板完全冇污糟，衞生工作一絲不苟。