前線醫護人員做錯嘢，公眾梗係鬧爆啦，但醫管局主席胡定旭拿拿臨喺月初發咗封公開信，貼晒係公立醫院大堂安撫佢哋。肥胡感同身受咁話，接連幾單醫療事故，佢同啲醫務人員一樣咁唔開心，指大家多年嚟努力建立嘅良好聲譽，因為一啲無心之失而受損，市民似乎唔記得咗醫護人員過去日以繼夜、盡心盡力為香港服務。

嘩！真係賴得就賴喎！跟住佢叫啲同事唔好因呢一點點挫折而感到沮喪，醫護人員要從失敗中吸取教訓，從錯誤中學習，進一步完善醫管局啲系統同機制，而大家凡事小心，多走一步，一如既往咁為市民服務。

最後佢話能夠作為醫護人員嘅主席深感榮幸，仲話醫護人員對工作嘅熱誠同敬業樂業嘅精神，都係佢做主席嘅最大推動力，仲話等佢同大家「手牽手，心連心，挺起胸膛，繼續為市民提供優質的醫療服務」。

好明顯佢係想穩定軍心啦，但睇起嚟真係有啲骨痹，而佢扮好人亦未必個個認同，好似代表醫護人員嘅立法會衞生服務界議員李國麟就直指肥胡喺度做PR（公關），事關呢啲PR工夫做咗冇壞，唔做就畀人鬧，梗係做得愈快愈好啦！但有好多根本嘅問題未解決。

懶理資源不足 玩殘護士

點解？李國麟話醫管局喺二○○○年以資源不足為由，摺埋咗護士學校，搞到依家護士人手短缺，叫醫管局增加資源增聘護士，局方就話無錢請唔起，但又留唔住啲資深護士，搞到護士工作量大增。

肥胡話要完善機制，李國麟話講咗咁多年，做咗啲乜吖？咪淨係寫多啲守則出嚟囉。佢講到明等立法會十月開波，即喺相關嘅事務委員會跟進，要求當局篤住醫管局做嘢，唔可以好似肥胡淨係識得齋噏。