之不過，喺成班港英餘孽高官嘅放任不管之下，都唔係一無是處嘅，香港都多咗一樣馳名中外嘅土特產，係乜？之唔係「搞搞震」囉。上面仲要寫到明係「此曲只應天上有，人間哪得幾回聞」添！弊在咁嘅土特產，送都冇人要啦！

其實一日都係多得嗰班泛民反對派，有正經嘢唔去做，將市民最關注嘅民生、經濟議題掟埋一邊唔理，只係專注搞搞震，香港想有運行都幾難！

嗱嗱嗱，二○一二年政改諮詢喺年底推出，本來係循序漸進、無事無幹㗎，但衰在呢班泛民冇嗰樣整嗰樣，搞個五區各派一名代表嘅五區總辭出嚟，又玩二十三名泛民議員集體總辭，既要求二○一二雙普選，又話要乜嘢路線圖。叮佢個鎯鎯，撩是鬥非都唔知為乜，真係多得佢哋唔少！

唉！呢班泛民友仔嘅政治智慧已經低到貼晒地，平時又神遊太虛，喂！知唔知人大已經決定二○一二唔會有雙普選㗎？而二○一七年普選特首、最快二○二○年普選立法會亦都有咗定案，有冇聽書呀？依家搞到一鑊泡，泛民自己鬼打鬼，認真難睇！

叮，泛民趷起條尾都知佢哋想點啦，其實無非係不甘寂寞之嘛。不過又難怪嘅，你知啦，泛民裏面好多人已經一把年紀，都唔知仲擺得幾耐，講得白啲，只係有啲人怕等唔到普選，以為咁樣就可以脅迫中央同埋特區政府讓步，諗住玩鋪勁。

舉個例吖，好似李漢奸咁，畢竟已經係日薄西山，莫講話二○二○年普選立法會未必等到，好有可能連二○一七年普選特首都睇唔到，當然想臨尾盡地一煲，有咁大玩咁大啦。

其實呢班泛民都唔使咁心急嘅，如果有人真係等唔到普選嗰日都唔緊要，太一叮當做吓好心，到時寫篇洋洋萬字嘅文章，燒落去畀佢哋解吓悶。

話時話，太一叮硬係唔明，點解澳門又係特區，香港又係特區，人哋就巴閉咯，回歸遲過香港，佢哋嘅人均生產總值以及旅客人數後發先至超越香港。人哋澳門政府唔係口噏噏當秘笈，唔需要嗌乜嘢雙普選，亦唔需要玩鋪勁，已經真真正正做到「強政勵治」、「以民為本」。

反觀香港已經夠晒亂，當務之急，應該係振興經濟同埋改善民生。弊在泛民慌死香港唔夠亂咁，仲要搞場大龍鳳逼港府解散立法會，喺呢個危急存亡之秋博亂，真係其心可誅呀！

冇計啦，鬼叫「五十年不變」已經名存實亡，畀人當作「五十年不管」咩，係咪真係唔玩殘香港唔得吖？係咪要一國兩制變一拍兩散至心息吖？叮！