王英偉尋日話萌生勇闖南極嘅念頭，都係多得專業及諮詢行政人員協會會長容永祺慫恿，佢貴為該會創會成員，點都要瞓身支持。佢哋十二月會啟程去南極探險十八日，同行有十六名會員，仲有南極探險家李樂詩同全國港區人大代表羅范椒芬。

佢對南極充滿憧憬，話最渴望觀賞南極嘅壯麗冰川。十二月份嘅南極剛好係夏天，凍極有個譜，但佢唔敢掉以輕心，嚟緊幾個月會四出搜購特強禦寒衣物。

搞手容永祺就話，南極之行將要穿越冰洋同冰河，其中有兩日旅程更有機會遇上六、七十呎高巨浪，認真「牙煙」，但諗起自己咁大個仔都未去過南極，點都要威一次喎。