馬拉松或半馬拉松賽一般都會喺啲公路上起步同進行，到臨尾先進入運動場跑多個圈同作最後衝線，但今次東亞運動會嘅半馬賽，就好罕有咁安排喺早前爆出豆腐渣工程疑雲嘅將軍澳運動場起步，然後走出場外嘅一段馬路，前後來回兜圈跑足八次，最後再翻兜番入運動場兜多個圈衝線。
關注東亞運籌備工作嘅立法會議員陳淑莊直斥有關安排係國際笑話，啲選手肯定會轉彎轉到頭暈，影響比賽表現，如果因而受傷，香港就更加孭唔起。佢表明會喺立法會復會後跟進事件，睇吓仲有冇可能搵過條夠長嘅賽道比賽，以免畀人笑到面黃。
東亞運公司話有關路線係經該公司同政府部門多次磋商後決定，並得到香港業餘田徑總會認可，又強調國際長跑例並冇規定賽道唔可以兜圈或最多只可兜幾多個圈，因此唔會影響跑手表現，但就冇解釋點解會作出咁荒謬嘅安排。問番田總，田總就叫我哋問番東亞運公司，東亞運籌委會主席霍震霆更加好似完全唔知情咁，總之大家就互相推波，冇人夠膽企出嚟孭飛解畫。