呢排立法會仲係抖緊暑，好多議員都外遊充電，唔少高官都唔例外，有「男版卿姐」之稱嘅「大舊」陳偉業早前就去咗加拿大出席囡囡嘅婚禮。
話說大舊喺當地閒逛時，去咗一個商場行街，離遠望到個熟口熟面嘅人影，原來係咁啱又去咗當地度假嘅政制及內地事務局常任秘書長羅智光，於是佢就一個箭步衝上去，再用佢一貫嘅超高聲量大嗌五區總辭、爭取二○一二年雙普選嘅口號。
羅智光同太太優哉游哉咁行緊街，勢估唔到突然有個牛高馬大嘅光頭佬衝埋嚟，仲嚟個攞命狂呼，自然畀對方嚇窒咗，仲以為畀人點錯相尋仇添！就因為事出突然，羅智光呆咗幾秒鐘之後，先至回過神嚟識得回應，話知道大舊好着緊普選問題，但吊頸都要抖吓氣㗎，使唔使追到嚟加拿大呀？
大舊瞓晒身爭取普選，但對爭取抱孫就唔係好積極。佢話囡囡今年只得二十四歲，唔使咁快放棄二人世界，又話最好就等到佢退休先至生，咁佢就可以專心幫佢哋手湊孫，唔會錯過未來孫仔或者孫女嘅任何美好成長片段喎！