同樣係無錫人嘅趙世光同哥哥趙世曾都有去撐商會場，睇好無錫前景嘅趙世光話會考慮加重喺無錫嘅投資，陪住佢嘅大女式明話自己成日返無錫巡視物業，問佢係咪開始接手爸爸嘅生意，佢就以笑嚟回應。至於搞地產嘅趙世曾就話個巿開始好，仲話最緊要人人有工開，自己唔會炒人。
富貴黨前主席田北俊就以旅發局主席身份出席洽談會，佢話媽媽係無錫人，所以自己都係半個無錫人。原來香港無錫人都唔嘢小噃！
另外，唐氏家族「年」字輩最細嘅唐耀年話依家幫四叔李兆基做投資經理，仲話四叔好睇得開，股巿上落都唔會愁眉苦臉，佢去年年尾嘅花紅拍得住投資銀行，夠買部靚車添！
