香港無錫商會尋日舉行第二屆會董就職典禮兼搞咗個懇談會，榮譽會長唐翔千家族上上下下都畀面出席。政務司司長唐唐最細嘅細佬阿Tom唐慶年係常務副會長，問佢撐唔撐大佬做特首，阿Tom話對大佬有信心。
至於大佬私底下有冇同佢講要選特首，阿Tom就故作神秘咁話：「我唔講得，會畀人鬧！」再問佢另一疑似候選人CY梁振英都好似有意參選，係咪同大佬爭？佢又鬼馬咁話：「我點可以咁講，會有人嬲！」究竟阿Tom係怕大佬鬧佢吖，驚壞咗大佬大事吖，定係驚CY鬧佢呢？
之後佢上台致辭，啲「煲冬瓜」相當爛，但台下嘅唐媽媽完全唔意外，事關佢哋屋企每日開Nicam，淨係講無錫話嘅唐爸爸同嚟自蘇州嘅唐媽媽用上海話交談，但唐媽媽同仔女就用廣東話，所以啲小朋友唔係好識無錫話同普通話，難怪唐媽媽笑佢哋兩仔爺鬧意見時雞同鴨講。