新界居民成日鬧政府政策僵化，令新界農地荒廢，但係政府一直懶理，新界鄉議局求人不如求己，自己搵浸會大學當代中國研究所聯手做研究，配合珠三角發展，搞活新界土地，尋日同研究所舉行簽約儀式。

吓！發叔外號係「新界王」，除咗話佢喺新界有Power外，實際上佢喺新界擁有多塊土地同物業，有「地王」稱號，咁呢個研究可能有利益衝突喎！就喺儀式結束前，佢特別聲明，指鄉議局呢個研究主要係釋放新界土地潛力，有利香港整體規劃，全港市民受惠。

撇清利益刀槍不入

好明顯薑係愈老嘅愈辣，發叔為各位行會同僚做咗一次正確示範，打晒鑼強調呢個研究有利香港整體利益，唔係純粹為咗新界利益㗎！做定利益申報，預先掃雷就唔怕踩地雷啦。睇嚟棠哥應該跟發叔上番兩堂政治課，咁就少好多麻煩嘞。

既然掃咗雷，發叔就好似髹咗金身刀槍不入咁，仲代啲鄉親父老出氣，狠批政府嘅土地政策同制度僵化，窒礙新界土地發展，好似農地業權人申請改變土地用途，遇到諸多掣肘，成功比例少之又少。

發叔話鄉議局將個問題向政府反映，講到口水都乾，政府一味話研究，所以鄉議局決定因應《珠三角地區改革發展規劃綱要》出台，聯同學術機構做研究，「做埋畀政府參考」，到時政府就冇藉口拖延。嗱！發叔好明顯係要踢政府做嘢啦！