小白觀點:以司局長為榜樣
近年興「隱蔽」,老人隱蔽,青年又隱蔽,連大學生都唔執輸,一齊加入埋隱蔽大家庭,到底隱蔽有乜好玩?
不過唔隱蔽又有乜好做吖,唔通做四千蚊實習生,連車費都蝕埋咩!不如留喺屋企等運到好過,希望有朝一日突然間升呢做到隱蔽司局長,一年閒閒哋幾百萬人工,一出事就即刻唔見影,咁就發達囉。
講開隱蔽,你有冇睇嗰套外國電視連續劇《Lost》?套劇好多嘢都係收收埋埋,懶詭秘懸疑,以為個編劇咁夠創意,唓!套嘢根本就係影射香港之嘛,成班友被迫留喺一個怪島,以為有自由意志?以為可以當家作主?原來所有嘢都有股神秘勢力控制住。
網友觀點...X)...
[ 小保 ]
連所謂嘅未來社會棟樑大學生都玩隱蔽,咁咪變隱蔽世界?我哋會唔會慢慢喺地球上消失㗎?
[ 村久保 ]
隱蔽可以尋找自我,又唔使同任何人交代,連行步路都唔想郁,喺屋企過每天,快樂過每天,yeah!
[ 子健 ]
外面嘅世界一塌糊塗,出去做乜吖,冇工做,返工又受氣,有都唔做啦,喺屋企打機上網,都夠我過成日啦!
[ 肥仔成 ]
日日隱蔽,炸彈都整到出嚟喇,幾有貢獻呀!
網址:www.sunsiupak.blogspot.com
阿豪觀點:天子門生只值四千蚊
以前有「隱蔽長者」,家陣有「隱蔽大學生」。乜嘢係「隱蔽大學生」?就係嗰啲搵嚟搵去都搵唔到工嘅大學生,屢戰屢敗,最終徹底放棄,但又過唔到自己嗰關,喺羞於求助下索性「柄」埋自己唔見人。
唔知點解,提到「隱蔽長者」,大家一副悲天憫人嘅樣,但講到「隱蔽大學生」,就即刻變臉,更有網友直斥只係偷懶嘅藉口。其實班大學生都好慘,以前就話「天子門生」啫,依家四千蚊實習計劃都要撈住先。計我話,應該取消所有大學,四年大學索性改名為高中四年級至七年級,然後收取番高中水平嘅學費。真正有興趣追求知識嘅年輕人,咪由得佢哋走去報讀高中四年級囉!
網友觀點...X)...
[ 孫明洋 ]
後生遙遙,匿得幾耐呀,唔好再咁揀擇咯……
[ joey ]
依家通街都係大學生,競爭咁大,搵唔到一萬,七、八千都要做住先啦,總好過留喺屋企等運到吖……
[ 匿名 ]
同意樓上joey講法,依家讀大學係must,唔代表啲咩,早啲出嚟做嘢,儲多啲經驗仲有用啲!
[ 成身學債 ]
大學生根本冇乜好出路,值唔值收咁貴學費呀?
網址:www.lukchiho.blogspot.com
發表方法:讀者如對本欄每日話題有任何意見,歡迎登入網址發表意見。本報保留採用刊登權利,不另作通知,敬請留意。
明日主題:公園危機處處