雖然話係「潑」唔係「掟」，但喺星期日嘅旺角街頭都分別唔大，因為事發現場人來人往，好多人誤中副車，事件中有另外九人無辜受傷。

警方表示初步調查之後，冇迹象顯示案件同之前嘅高空投擲腐蝕性液體案有關，相信事件係涉及桃色糾紛。叮，話就話暫時估計冇關啫，你知啦，旺角去年底至今，已經發生咗多次腐蝕性液體傷人事件，香港人驚魂未定，談鏹水色變，唔驚就假咯！

劑劑出現鏹水狂徒，警方一時大大聲話交由警隊王牌重案組跟進，一時又話要啟動超級電腦協助查案。再唔係，就由成班專家出嚟做大騷重組案情，以為好快就可以將狂徒繩之於法啦。

點知搞咗咁多場大龍鳳，再加埋警方懸紅九十萬元緝兇，案件依然茫無頭緒，好似變咗無頭公案咁。至今冇人被捕，小市民唔知邊日輪到自己中招，又點會唔人心惶惶吖？

叮，鏹水狂徒仍然逍遙法外，原因好簡單，咪係警方辦案求求其其囉！唔好以為喺旺角大廈天台裝晒天眼有用呀，即使天眼影到狂徒嘅廬山真面目又點吖，警方都未必拉到人o架。

嗱嗱嗱，深水埗一幢住宅大廈曾經被賊人潛入，偷走電梯大堂嘅閉路電視液晶體顯示屏，呢個笨賊有好彩有唔好彩。先講唔好彩吖，原來笨賊嘅容貌以及成個犯案過程，畀大廈保安系統嘅高清鏡頭拍低，保安員將「高清偷竊實錄」片段交畀警方，理論上應該好快拉到人。

但呢個笨賊今次又極之好彩喎，警方是是但但調查咗二十二日就宣布投降，回覆業主立案法團話未能拘捕疑犯所以終止調查。叮，唔係啩？保安系統鏡頭話到明高清，梗係清晰可見，咁都拉唔到人？有冇搞錯呀！

不過最搞笑嘅係，當本報就事件向警方查證後，警方又失驚無神重新啟動調查程序，仲將疑人嘅照片分發畀巡邏警員。由此可見，警方辦案踢一腳郁一郁，係幾咁兒戲吖。

話時話，最近啲差人負面新聞多過乜，探員好人當賊辦涉嫌將人打到變豬頭有之，涉嫌粗暴對待性工作者兼食霸王餐又有之，甚至有淫警喺警署非禮強姦女報案人都有！小市民連佢哋係兵係賊都未分得開，試問點靠佢哋儆惡懲奸？

叮佢個鎯鎯，香港警隊嘅薪酬福利可以講得上係冠絕全球。正所謂「食君之祿，擔君之憂」，好心唔好一味掛住加人工，盡心盡力維護法紀、撲滅罪行啦，等小市民行旺角時唔使擔驚受怕，呢個要求都唔係好過分啩？