尋日波波同班年輕人打籃球嘅時候，話正生書院校長陳兆焯打咗電話畀佢，表示正生董事會已開過會傾過有關問題，之後都係決定希望搵間國際性嘅會計師行嚟做核數，所以打嚟通知佢唔使佢幫手咁話。

老實講，本來一心幫手，點知人哋後來彈番轉頭，仲話搵間「國際性」嘅行嚟做幫手，聽起嚟唔通係嫌棄波波？波波好有風度咁話冇乜所謂，但會後好刻意咁話自己冇hard feeling。

到底最後正生搵咗邊間「國際性」嘅行嚟做，就連波波都唔知，佢話可能正生都未決定。咁佢又會唔會送佛送到西，介紹埋間會計師行畀正生呢？佢話呢啲免得過就免，因為「手掌係肉，手背又係肉」，無謂順得哥情失嫂意喎！其實佢嘅考慮都啱嘅，如果因為幫正生而令到行家覺得佢偏心就無謂啦！

講番個比賽，唔講唔知原來波波都幾好波，雖然最後佢嗰隊輸咗，但成隊嘅得分當中，有一半係佢攞返嚟嘅。佢話好耐冇打過波，今次同班年輕人一齊打，令佢覺得自己後生咗喎！