尋日喺一個場合見到合和實業主席「哥頓」胡應湘嘅太太郭秀萍，佢啱啱同老公去完長江三峽遊山玩水兼搵商機返嚟，「哥頓太」話保就業呢家嘢，合和自己都搞得掂，一日未去到最惡劣嘅環境，佢哋都唔會炒人。至於話撐企業，佢話好多中小企朋友都好困難，希望政府着墨多啲幫佢哋。咁穩金融呢？股票係有得升，但佢覺得暗湧多，佢都唔敢亂咁出手，仲叫各位靚太姊妹要小心波動。

哥頓太仲自爆話佢喺歐美、香港同澳門都有物業，有樓、有舖、有廠，但呢排都唔急入貨住，因為樓巿升得好急，連中高收入嘅人都難以應付，仲話唔望見到跌市，畀大家有機會撈底喎。