車水馬龍嘅灣仔，忽然一大朝早製造奇景，路陷水淹，水柱從地底怒噴。嘩！人哋就春城無處不飛花，我哋就香城無處不噴水，遲啲泰國潑水節勢必移師香港呢個「噴泉之都」。在炎熱的動感創意之城，喂！大家暫且拋開一切，咪估下屆誰是特首？電子書爛尾會唔會翻生？邊鬼個天王巨星唔再玩「誰是我終極愛人」，改玩「誰會是我地下情人或永不浮面的長伴三奶」？
香港香港，幾古靈精怪都有！你潑潑，我潑潑，潑吓潑吓，暑氣全消，躁氣冇晒。邱騰華局長，筆者第一次騰空轉體三百六十度支持你嘅偉大動作設計，攝氏三十四度春風滿面笑着「停車熄匙」，濕晒原來咁好玩！感謝水務署，多謝運輸署，你哋「排唔到期」搞出個「車龍四公里，水浸落地行」的亞洲奇景，講真，呢個時候加水費又好，增排污費又好，我一定支持！
香港啲水管老化，你哋話要二十年才可全部更換。其實你哋肯去做，一日就搞掂灣仔嘅大片路陷澤國，話咁快就將「噴泉之都」變「寧靜之城」，又再證明香港工人效率一流，有佢哋，換水管起高樓？使乜愁！
孟子有句話叫「人飢己飢，人溺己溺」，即係看到有人捱餓，就好像是自己讓他們捱餓一樣；睇見有人淹死，就好像是自己讓他淹死一樣。其實，聖人嘅意思係講執政者要盡心為人民服務，每一個百姓的困難都是我的責任。筆者相信水務署高官冇理由睇唔到市民趕上班時嘅狼狽。哦！水為財！噴吓噴吓，馬季開鑼啦，馬迷想贏錢，任由鹹水濺！