各部門為新實施嘅違例吸煙定額罰款埋單計數，但「成績」參差，有啲幾積極，有啲幾乎乜都冇做，睇嚟睇去得個「亂」字。呢嗱，控煙辦至「威水」，兩日一共發出十四張定額罰款通知書；三個輔助執法部門得房屋署發出一張「牛肉乾」咁大把。

最諷刺就係，啱啱實施禁煙新例嘅有蓋巴士總站，居然冇人被檢控。唔通煙民個個轉晒性自動禁煙？梗係唔係啦，喺多個巴士總站一樣有人當新例冇到，照樣吞雲吐霧。

市民多數支持政府禁煙，亦都明白將公共運輸交匯處列入禁煙範圍，煙民需要時間適應，初期應該口頭警告為主，票控數字低唔出奇，但唔同部門嘅口頭警告數字竟然差天共地。食環署喺新例實施後兩日發出咗七宗口頭警告；但康文署就認真巴閉，一共發出咗四百三十五宗口頭警告。

叮！口頭警告數字差幾十倍，兩個部門係咪做緊同一樣嘢，用緊同一套標準㗎？煙民喺呢度一支駁一支咁食冇人理，行過隔籬啱啱想點煙就畀人警告，甚至罰款，咁咪盞攞交嚟嗌？

唔同部門各有各玩不特止，同一部門管理層同工會一樣拗到面紅耳熱。呢嗱，食環署就有工會聲言唔會執法，尋日仲有十幾個代表踩上立法會申訴部，抗議署方要佢哋兼顧控煙。署方就話，聯絡過十二個主要工會，對方承諾會按部門指引堅守崗位執法。

叮！睇吓食環署嗰份控煙執法指引，就知佢哋點解會包尾啦。原來指引規定，目睹違法可以畀「牛肉乾」，如果會引起衝突，係咁意口頭警告吓就算，即係「煙民愈反抗愈唔使罰」。既然係咁，前線員工咪消極對付違例吸煙人士囉。禁煙如同走過場，有效至奇啦。

食環署署長卓永興唔檢討吓咁荒謬嘅「指引」，仲話班手下攞得份糧，就要做好份工，疏忽職守嘅員工會受到紀律處分。其實控煙搞到一鑊泡，個個月攞十幾廿萬嘅高官，又幾時做好過自己份工吖？

控煙唔湯唔水完全係因為政策混亂，決策白癡。政府禁食唔禁賣，唔止不合邏輯，更加係虛偽。為咗證明「決心」，要擴大禁煙範圍，又唔增加人手；為實施定額罰款要臨時拉伕，將多個部門拖落水，又冇統一指引，令前線員工同市民都無所適從。咁搞法，唔止禁煙效果達唔到，仲會引起更多爭拗。

政府無能，正一亂開有條路，校園驗毒係咁，控煙又係咁，未諗清諗楚點做就夾硬嚟。高官得把口噏，下面掛住扭計，控煙未見成效，政府已經一頭煙啦。叮！