梁美芬喺會面後話，前日啱啱同班深水埗區議員聯手成功反對港鐵南昌站毗鄰嘅六號地盤發展公屋，有望改為興建大會堂；其後劉秀成話自己係房委會委員，唔贊成公屋遭攔截，仲話千祈唔好將自己唔鍾意嘅嘢推畀第二個區去做。梁美芬聽到即時強調自己並非反對興建公屋，而係唔想起高樓產生屏風樓效應，兩人即時火花四濺。過去何鍾泰、劉秀成、石禮謙三個試過為港珠澳香港口岸撥款問題火併，而梁美芬又同過何鍾泰喺雷曼小組委員會上公然嗌交，似乎佢哋互拚已成習慣。